Ka Jalai-jalai ngiga pemakai....

Akai, nyau sendat seput sebulan-bulan tok..Otak nyau beku..Nyau enda ulih berunding agi...Lelak amat bebaca ke bala bup enggau journals...Enggai nda pia, enti enda macha enggai nyadi ga ngaga pengawa...Ari satu 29 hb tok ka nganjung "first draft" ngagai supervisor...Nasib nyau ujung-ujung tok pengawa nyau udah ka tembu...Nyau kurang ga tusah ati..Tusah pengawa ke bisi "deadline" tok..Nyau enda ulih beseput nama nyau udah semak ka nganjung pengawa..Tang nadai ngawa ga nya, laban setiap utai ke di gaga kitai sigi bisi penguntung ia..Makin mayuh kitai macha, makin mayuh ga penemu ke ditemu kitai..Mayanya meh kitai lalu berunding "ooo baka tu utainya", "ooo enda kala aku nemu utai tok bisi sangkut paut enggau utai tok"..Lebih kurang bakanya la penemu ke di ulih kitai lebuh kitai macha mayuh...Aku meransang bala kitai anang enda macha...Mayuh penemu enti kitai rajin macha...Enda ngira nama utai ke di bacha kita, aku percaya ia sigi nulung nambah ke penemu kitai...

Udah tembu ngajung "draft" nya ila, aku berunding ka belelak sekejap...Bisi ga ati bejalai ngagai sebelah menua ba Australia ditu...Nitih ka ati ka ga bejalai ngagai Sidney tauka Gold Coast...Meda enti cukup budget ila...Alang-alang udah datai ditu, rugi ga enti enda bejalai...belelak ngambi seminggu sebedau start ngadu ke pengawa baru...Enda ga alah nyau dipajak otak ngadu ke pengawa belama..Sekali sekali perlu ga ia belelak...hahaha

Bekenang ke pengawa ke nyadi seminggu tok, nyau tekenyit ati ningga Micheal Jackson seduai Farrah Fawcett (pelakon Charlie's Angel) nyau nadai...Sinu amat ngenang seduai ia tok..Lebih-lebih agi MJ laban aku sigi cukup rindu ninga lagu akih tok...Tambah mega agi biak amat umur ia nadai...Taja tudah tuai udah nadai, pengawa besai ke digaga ia sigi semampai dikingat ke bala peminat ia...Lebih-lebih agi lagu ia ke cukup di kerindu bala mayuh...Sapa meh orang ke bertuah ngembu reta ia neh?..haha...Beserimbai enggau penadai seduai tok, nyau berunding ga tudah aku...Cukup besai pengawa Tuhan..Nama Ia ka ngambi nyawa kitai, ia ulih ngambi "anytime"....Akai, empai besedia amat asai diri empu tok...haha...Mayuh-mayuh meh ngawa pengawa ke manah..Ngambi ke enti masa kitai udah "datai", sekurang-kurang kitai udah bersedia bertemu enggau Tuhan...Nya, nyau berkhotbah aku ditu...haha...bah, mupok aku, betemu baru....

Winter

Udah setat winter ba Australia ditu. Tang sebedau winter suba pun menua ditu sigi udah cukup celap. Diatu benung winter penyelap sekitar 6 - 7 darjah C. Tumu pagi serta malam sigi cukup celap. Enti di menua kitai din kitai bekena ke air-cond, tang menua ditu nyelai. Nyau bekalih. Maya winter ditu bekena ke heater ngambi ke rumah angat. Enti enda pia, sigi tusah ka ngangat ke tubuh diri. Bala pua ukai cukup, taja pan pua ke tebal-tebal. Baju kena pansut datai dua tiga lapis. Nya pun agi teketak-ketak laban celap. Tambah agi pun bulan maya winter baru setat sarinya ari cukup ka ujan enggau udu beribut. Nya nambah ke penyelap ia agi. Pengelama winter tok engka datai tiga tauka empat bulan. Tang menua Australia tok nyelai mimit ari menua celap ke bukai. Ditu nadai snow tauka salji. Semina ba bukit-bukit tauka gunung aja bisi bersalji. Manah ga bakanya. Enti bisi bersalji enda nemu baka ni penyelap ia. Siti agi utai ke nyelai, malam cukup jampat. Nama udah pukul 4.30 lemai bakanya, ari udah nyau petang. Nama udah pukul 5 bakanya, ari sigi udah cukup gelap nyau baka ka pukul 8 kitai di menua din. Nyau kurang meh siang kami ditu lebuh maya winter tok. Mujur tubuh ulih nerima penyelap bakatu. Enti enda sigi senang amat ka sakit. Bulan 7 ila engka ka bejalai sebelah gunung ka meda tauka bermain salji. Maya diatu engka bedau tentu tebal salji laban winter ke baru setat.

Siti agi penanggul ba menua Victoria ditu ianya cukup mayuh kes H1N1 tauka swine flu. Kes ke paling tinggi ba menua Australia. Nyau tusah ati lebuh maya pansut ari rumah. Siti ke ngasuh kurang susah ati, kes H1N1 ditu nadai kes bebadi. Semina kes tabin aja. Enda baka ba menua bukai ka udu diserang flu tok ke nyau ngasuh nyawa bebadi. Besampi ngambi ke kes tabin tok ulih di kawal meh serata menua. Gambar bulan ke di atas di ambi aku maya pukul 4 lemai. Nyau udah tumbuh bulan mayanya. Nanda ke ari nyau ka malam meh nya.Bah, mupok dulu aku.

*Ngarap ke kita ba menua din ngintu pengerai diri enggau manah. Lebih-lebih agi ninga berita kita di menua din nyau bejerebu.

Busy....

Nadai ari amat ka update blog...Cukup busy bulan tok laban perlu nganjung pengawa ngagai supervisor ujung bulan tok...Terkurung dalam office sepemanjai minggu... Jam enggau ari bejalai pan nyau enda berasai..Tumu pagi nurun, sibuk ngadu ke pengawa di office nyau enda berasai ari nyau malam...Tambah mega diatu benung musim 'winter'. Ari jampat amat malam. Pukul 4.30 bakanya nyau udah gelap. Penyelap ari anang ngira. Pagi tu tadi 6 c...Cukup penyelap...Nyau getak-getak isi taja pun ngena baju sampai 3 lapis...Tambah mega udu beribut enggau ujan...Nya ngasuh ari majak celap...Nadai mayuh pengawa di luar ulih di gaga maya winter enggau ari ke celap baka tu...Enggai enda enggai ngurung diri di office tauka rumah ajak meh...Udah tembu pengawa tok ila bisi ga ati ka bejalai..Tambah ujung bulan tok ila nembiak ke undergrade udah bercuti...Maya tok bala supervisors pun mayuh bercuti...Bisi ga ati ka bejalai ngagai Sidney tauka Gold Coast...Semadi udah datai ditu, rugi enti enda bejalai pia ko aku...Nya pun meda gaya enti enda kelalu bisi lalu bisi duit kena bejalai..hehehe....

Nyadi baka kita ke ba menua din, nama insur udah di ulih sekumbang udah gawai tok....Nyau udah start gawa baru bala pelaba aku...Enda berasai nyau datai baru ga gawai taun dudi...Aku cukup berasai masa bejalai cukup laju sekumbang ke udah di menua Australia ditu...Enda nemu nama kebuah..Engka laban ke mayuh pengawa kini..Nya ngasuh enda berasai..Asai ke baru kemari ujung minggu, tang enda berasai pagi ila nyau ari enam baru...Runding sigi enda badu-badu irau lebih-lebih agi ke pengawa Thesis...Maya mandi berunding, maya bejalai berunding, maya makai berunding, maya sebedau tinduk berunding...Akai dai, adai pa tan enti majak baka tok...Jauh nyamai pengawa kerja di office berbanding pengawa belajar tok...Enda sabar-sabar ke jampat tembu ngambi ke otak kurang berunding...hahaha.....Bah, mupok dulu aku...Mayuh agi pengawa ka di adu tok...

Begawai enggau Bup

Orang di menua din engka benung begau ngerami ke Ari Gawai ke di intu kitai tiap taun kena 1 bulan enam, tang tudah aku benung kiroh bebacha ke bala bup enggau journals laban bos (supervisor) majak minta progress. Nyau pedis asai pala. Nya meh penusah nama udah belajar baru baka tu. Ka belelak pun nyau nadai sempat. Kenu ka jako ka cuti maya 1/2 aribulan laban ka ngerumba pegerami gawai kitai, tang nadai ko enggau laban mayuh amat pengawa. Nadai ga nya tentu ngawa laban manah ga sibuk baka tu. Sekurang-kurang ia ulih ga ngelari ke runding ke majak ingat ke bala indai, meyadi enggau bala kaban ke benung ngerami gawai. Laban ke udah kelalu sibuk, nyau enda berasai gawai nyau udah ba ari ke tiga. Enti ba menua kami di Sebuyau din, agi rami bala. Seagi-agi bala bedau pulai ke negeri, seaginya meh bala berami agi berami. Kadang-kadang 5-6 ari bulan agi asai ke 1 - 2 ari bulan laban bala agi bejalai ngabang ngagai rumah pangan diri.

Nya, jako ka ngerari ke diri berunding pasal hal gawai, agi ga bejako pasal gawai ba menua. Sigi tusah ka ngelengka ke runding ari pengawa gawai tok. Kemari betemu enggau supervisor. Akai, lalu di anu ia tudah aku laban ko ia aku 'progress' aku lubah amat. Dini ulih jampat bos, runding seminggu dua tok sigi nadai ke bukai. Berunding ke ari gawai aja.hahaha...Dini ke begerak laju. Nyau nadai runding ka ngaga pengawa 'thesis'. Enggai nyadi disangkal jako supervisornya laban sigi salah diri empu. Ngaku aja meh. Arap ke udah gawai tok ila pengawa ngadu ke 'proposal' aku tu mujur meh. Sama-sama bersampi ka aku au bala pemacha.


*Mesti bala ba menua din benung sebungau maya jam diatu jamah pangkung botol. hahaha...Jimat maya ngabang, ngasai pala ngelu, anang driba wai meyadi...Bala ibu nyau kanyak2 berjugit poco2 pelaba aku....akaiiiii, rugi amat ahhh...Adai pa tan!

Selamat Ari Gawai Dayak

Tusah serta sinu ati taun tok laban ke enda ulih pulai ke menua berserimbai ngau pengerami Gawai Dayak ti ka datai tok. Jarang amat enda pulai gawai ke menua. Ngasuh ati tambah sinu laban demalam indai aku kol madah kediri pulai sampal ke Sebuyau. Bala menyadi nyau ka sampal pulai taun tok. Semina tudah aku enggau aka aku Edwin ke enda ulih pulai. Akai, cukup sinu amat ati enda ulih pulai. Enda pulai ukai ketegal menua jauh, tang kelalu mayuh pengawa ke perlu di gaga enggau di anjung ngagai supervisor. Enti enda ketegalnya, sigi udah aku ngejang kediri pulai ngerami gawai enggau bala di menua. Aku sigi jarang enda pulai lebuh maya gawai. Nadai pengerami bukai ti ulih nanding ke pengerami gawai kitai. Tu meh maya kitai bisi awak betemu enggau bala apai indai, madi engkau kaban belayan serta suku juru. Tambah mega tok meh maya kitai sama-sama bebela ke bala kaban enggau bala pengabang ke bukai nanda ke kitai cukup berterima kasih ngagai Tuhan ke jereki ke di beri Ia ngagai kitai sepemanjai taun.

Engka lain mimit gawai taun tok bebanding enggau taun ke bukai-bukai laban kami sebilik agi berasai puang sepengudah pemegi aka tuai aku bulan dua belas suba. Ia ke ndi asuh nyaga menua ngelama tok. Enti kami semadi pulai gawai sigi nuju rumah ia. ngelama tok. Tang taun tok sigi berasai amat penadai aka akunya. Udah la ngelama tok sigi ia ke selalu udu bangat gaga enti ninga rita bala madi ia pulai. Suah tudah ia kol laban ka "confirm" nyadi ke enda kami pulai. Nama udah datai ba pala tangga, dia meda ia gaga ati lalu enda badu-badu tuchum lalu sibuk ke atas ke baruh laban cukup gaga ati. Lalu disedia ia macham-macham utai ke bala indai, madi enggau bala anak buah ia ke pulai mayanya. Nadai ko enggau, Tuhan lebih sayau ke ia. Aku ke ba menua jauh tok pun berasai amat puang sepengudah ke ia nadai lebih-lebih agi beserimbai enggau ari gawai tok.

Cukup enda rindang ati seminggu-minggu tok laban ke enda enggau bala begawai ba menua. Taja pan mayuh pengawa, tang nadai bisi ati ka gawa. Tambah tusah ati, laban nadai bala Iban tauka Dayak bukai begulai sama belajar enggau aku ba Uni tok. Semina siko indu Bidayuh. Ia sama mega enda ulih pulai taun tok. Tuai ia sama-sama bangat sinu ati. Sama ngerindang ati pangan diri meh tuai ia. Nadai ko enggau, taun dudi kini pulai enti nadai penanggul.

Enggau awak tok, aku meri selamat ari gawai dayak ngagai bala kami sebilik, bala kaban -belayan, bala kaban dini-dini endur sida diau enggau semua orang DAYAK ke diau serata menua. Besampi ngambi ke terus diberkat Tuhan, panjai umur, murah jereki enggau sama-sama ngiga insur ngambi ke bansa kitai terus maju nitih ke bansa bukai serta pemaju dunia IT kemaya ari tu. SELAMAT GAWAI DAYAK 2009......

Preston Market

Enda berasai nyau datai baru ari enam. Pejam enchelak, pejam enchelak, nyau enda berasai ari bertukar ganti. Tambah enti mayuh pengawa, enda berasai amat ari nyau bertukar malam. Tusah ati belama laban pengawa enda tembu-tembu. Pengawa belajar tok sigi enda nemu tembu pengawa. Nya meh ngasuh ati majak tusah belama laban udu berunding ke pengawa ke dipelajar. Nya meh pengidup sepemanjai ke udah sekula baru tok.Ninting ari pengawa thesis ajak-ajak di dalam runding. Nyau enda berunding ke utai bukai. Saritok tadi aku mutus ati enggai ngawa pengawa Thesis. Ka rilek ko jako. Dani pagi sekitar 7 pagi kami ditok lalu nyelungkar fridge laban perut ke berasai lapar. "Apu!, nyau nadai agi utai dalam fridge tok,"pia ko aku bejako kediri. Bala dagin enggau ikan nyau nadai agi. Enti baka tok enggai nyadi enda ke market ko aku bejako dalam hati. Aku lalu mandi laban ka nyedia kediri ka nurun ke market. Bebeli ke bala lauk enggau barang dapur ke nadai. Ditu bisi supermarket ke semak, tang masalah ia sida nadai berjual utai ke fresh baka bala sida ikan. Manah aku nurun ngagai Preston Market pia ke aku. Preston Market tok baru bisi berjual utai ke macham-macham. Bisi bala ikan, dagin, sayur, baju enggau macam-macham utai ke bukai. Enda nyalah baka tamu/market bintulu kitai din tang nyelai mimit laban ia bisi berjual ke bala baju enggau macham-macham utai ke bukai. Market tok jauh mimit ari alai aku diau. Lebih kurang 20-30 minit. Tang laban ke ka begiga ka ikan fresh, terpaksa la kin. Supermarket ke semak nadai berjual ke bala ikan.

Datai ba market meda mayuh amat orang. Akai, terpaksa berebut bebeli ke utai. Aku sempat meli ikan red snapper, ikan ke baka ikan kembung, dagin enggau bebeli ke sayur. Enda ga nyangka bisi ikan red snapper ditu. Enti masak kari tauka masak asam nyamai pia ko aku. Udahnya aku singgah ba Asian Market laban ka meli rempah kari enggau masam asam ke udah dalam bungkusnya (instant paste baka rempah adabi). Nyamai enti berapi ngenanya. JAmpat enti maya berapi. Haha...Aku laban ke enda nemu nama rempah kena begaga ke kari enggau masak asam, manah agi meli ke udah dalam bungkusnya.

Udah puas ati enggau utai ke udah dibeli, aku lalu mupok ke diri ngena tram. Enda mukai-mukai, dalam pejalai tram lalu berenti. Enda nemu nama kebuah tang lama ga nganti. Udahnya driver bejako madah ke manah kami ke numpang tramnya nurun dulu laban bisi tram belantak di depan kami ko ia. Enda nemu kemaya ulih tembu ngalih ke tramnya. Akai, masalah amat. Tram tok ngetu enda jauh ari padang orang ke main football. Nyebut pasal football, ukai main bol baka kitai din. Tok lebih kurang baka American Football. Enti main bol ko kitai din, soccer ko sida ia ditu. Aku lalu nurun ari tram. Semadi nganti tram ke bejalai baru, manah agi aku meda orang bermain. Lebih kurang 30 minit udahnya baru tram bejalai baru. Alu lalu mupok ngemulai kediri. Nyau lemai baru datai di rumah. Perut pun nyau lapar. Aku lalu berapi manduk bakuteh laban bisi meli rempah ia tadi. Udah makai aku lalu ninduk ke diri. Haha..lelak amat asai isi. Lemai juging muai peluh enggau lemak ari bakuteh ka di empa tadi. Pama meh, muai lemak sekeda. Udahla ditu tusah amat ka berpeluh laban semampai chelap. Panjai amat cerita aku ba post kali tok. Ngetu dulu aku. Ila bertemu baru...Mupok aku..

Eagle Bar & Oldtown Kopitiam

Ba U endor aku belajar ditu bisi tempat alai student lepak kena ngelantang ke ati leboh maya udah lelak belajar (kenu ko jako..haha). Tempat tok di kumbai Eagle Bar. Ba bar tok bisi endur alai main pool, main games ke ba machine enggau bisi mega bejual ai bisa ko kitai. Kadang-kadang sida ngaga macham-macham pertandingan enda ngira pekit belagu, belaban pengering maut lengan pangan diri, pekit main music lalu macham-macham pekit ke bukai. Pengawa tok selalu di adu maya malam ari empat. Lalu maya ari empat mega bar tok dibuka sampai ke pukul 1 pagi. Ari bukai ia tutup dalam pukul 7 lemai bakanya. Ari empat tok tadi aku cuba ngeruh ai enggau orang lepak dia enggau bala kaban ke mai aku. Cukup mayuh bala student lepak dia. Pemayuh student lepak bertambah lebuh maya nyau majak jauh malam. Nyau penuh barnya jamah bala student ke lepak laban kena muai pengelelak laban ke udah bendar belajar kenu ko jako. Tambah malamnya bisi pekit karoake. Nya ngasuh nyau penuh kini. Ai dijual enda ga mar gilak. Enti ai beer, dalam AUD10 sejug bakanya. Sigi dijual murah pelaba aku laban orang ke lepak ditok sigi bala student. Nya kebuah rega ai enda entu mar baka ke ba luar.Manah amai ga U ba menua Australia ditu laban ke bisi nyedia tempat baka tok. Enti ba menua kitai din, nyampau tau ngaga tempat baka tok ba sebelah U. Nya meh, lain menua, lain ga atur ia. Bisi pemanah, bisi gak penyai ia.

Ari enam tok tadi mega aku bejalai ngagai rumah kaban aku ka ba Melbourne ditok lalu bermalam ba rumah ia. Pagi tadi ia mai aku makai ba siti restoran Malaysia. Nama restoran tok ianya Oldtown Kopitiam. Macham-macham pemakai Malaysia dijual ditok baka nasi lemak, asam pedas, kari ikan, kari manuk, cendul, bakuteh, enggau macham-macham pemakai ke bukai. Nyamai amat ga belelang ba menua Australia ditu laban enda susah ngiga pemakai menua kitai din. Aku selalu ga mansa tempat endur restoran tok tang enda perasan ke bisi restoran tok ditu laban ngelama tok bejalai mata malik ke bukai...haha...Aku ngoder nasi lemak berlauk rendang dagin enggau ssambal suntung lalu ai laici. Cukup nyamai nasi lemak di panduk taukeh ba restoran tok. Lama enda makai nasi lemak ke nyamai bakanya. Lalu cukup mayuh diberi sida. Enda baka ba menua kitai din, cukup mimit enti ngoder sepingai. Cukup tepantut ati laban udah lama tetenguk ka makai nasi lemak..Nya enda tepeliur kita..haha..Nadai ngawa bala kaban ka diau ba menua din, dani tumu pagi ila alu terus ke kedai mamak makai nasi lemak enti terpeliur ninga cerita aku tadi...Mupok dulu aku...