Jalai - Jalai Cuci Mata 3 - Puffing Billy

Tempat tok dikumbai "Australia's favourite steam train". Landasan kereta api "steam" tok di gaga kelia munya (lebih kurang awal tahun 1900s kelia). Tang landasan enggau train agi dikena sampai ke diatu tang semina mai temuai enggau pelancong aja la. Landasan kerata api ia ba atas bukit lalu agi ngenan ke laluan asal ia ari Belgrave ngagai Gembrook. Lalu sepemanjai pejalainya kitai ulih meda pemanah Dandenong Ranges.

P/S:..Photos by Yusry Kamen

Jalai -Jalai Cuci Mata 2 - Great Ocean Road, Victoria

Siti agi tempat ke cukup manah ba Victoria ditu (paling manah bagi aku) ianya bejalai sepemanjai Great Ocean Road (GOR). Tempat tok dikumbai "one of the world's most scenic roads" ba sepiak "south-west" Victoria. Ba GOR tok mega kita ulih meda 12 Apostles (batu-batu nyau ka baka pulau mit ba tebing tasik ke cukup manah dipeda). Sigi aja masalah ia, tempat tok cukup jauh. Enti ka bejalai kitu, perlu sekurang-kurang ia sari laban pejalai ngena kerita pulai mansang lebih kurang 6-8 jam. Tang taja jauh, nadai pengerugi laban tempat tok sigi cukup manah. Anang enda ngelawa tempat tok enti kita datai ke Melbourne tauka Victoria. Cukup manah pemandangan lebih-lebih agi enti maya ari manah enggau langit biru...

P/S:...Photos by Yusry Kamen

Jalai - Jalai Cuci Mata 1 - Phillip Island, Victoria

Gambar penguin bejalai tok di ambi ari website: visitphillipisland.com

Phillip Island tok Ba Western Port ba negeri Victoria, Australia. Cukup dikelala enggau pemanah pantai ia enggau tok meh siti-siti pulau ke bisi burung Penguin. Penguin ditu nyelai ari Penguin bukai laban gamal ia mit. Enda nyalah-nyalah baka pemesai burung puyuh kitai di Malaysia. Tang maya kami sebuat ngelawa pulau tok, bala Penguin agi benung ngenan diri ba sarang. enda dipeda maya sida bejalai ba pantai. Cukup manah tempat tok. Enti kita bisi nemuai ngagai menua Victoria, Australia, anang enda kita ngelawa tempat tok.

P/S: Photos by Yusry Kamen

Masuk Office.......

Minggu tok baru masuk office di skul sepengudah skul tutup seminggu kena ngerami Christmas enggau New Year 2010. Nyau lembau amat isi enggau runding ka ngaga pengawa. Keterubah ia Christmas ba menua orang, nyau sinu asai ati. Udah la Christmas orang ditu ukainya baka Christmas kita di menua. Sunyi amat. Enti di menua nyau begau bala berami. Ukainya 25 haribulan aja. Kadang-kadang nyau sampai ke taun baru.

Tang nasib bisi bala ari Malaysia bisi ngelawa aku di Melbourne. Enda ga berasai kelalu sunyi. Nyau rindu mai sida bejalai kin kia. Nyau enda berasai ari bejalai. Ari Chrismas sarinya bisi ngaga makai-makai enggau bala kaban ditu. Taja enda bangat rami baka kitai di menua din, cukup meh dikena ngigat ka Christmas. Udahnya aku bejalai ngagai Sydney mai bala bejalai kin. Tiga malam kami sebuat din. Cukup mayuh orang ba Sydney. Sigi gaya enti lebuh cuti hujung taun. Orang ditu sigi rindu bejalai lebuh maya cuti. Nyau tusut pala meda pemayuh bala mensia. Pulai baru ke melbourne lebih kurang sama ga. Mayuh amat bala mensia bejalai sebelah pasar. Udahla ari kami maya nya enta tentu. kadang-kadang ujan, kadang-kadang panas amat. Nyau regak jamah ari bakanya.

Sebedau taun baru, bala ke ngelawa aku nyau pulai baru ke Malaysia. Ngagai Mr. and Mrs. Chriss, happy Anniversary. Besampi ngambi ke seduai terus begulai meruan sampai ke pengujung nyawa, bertambah jereki enggau diberkat Tuhan belama. Terima kasih laban udah ngelawa aku di melbourne ditu. Minta ampun enti mayuh pengurang. Ila nemuai baru auk....

Udahnya bisi ga bala geng ari Malaysia datai. Aku lalu ngerami taun baru enggau bala sida. Ujung taun tok aku cukup rindu laban mayuh amat bala ngelawa aku di melbourne ditu. Nyau tepantup lelengau ke menua.

Sari tok nyau masuk 6 ari kitai udah masuk ngagai Taun Baru 2010. Enda berasai amat ari bejalai. Taja enda semua utai ke dikingin di ulih taun ke udah, besampi ngambi ke taun tok mayuh agi pengawa manah nyadi dalam pengidup aku. Berterima kasih mega ngaga Tuhan kesemua berkat ke udah diberi Ia ngagai aku ke taun ke udah. Sekali agi aku meri Selamat Taun Baru ngagai bala kitai semua. Sama-sama meh kitai ngelipat kali ganda usaha kita ba taun tok ngambi ke mayuh agi insur di ulih kitai. Mupok dulu aku....

Merry Christmas and Happy New Year 2010

Lama amat nadai update blog aku tok. Nadai ari amat ka bekarang ke cerita. Mayuh ga aktiviti di gaga beberapa minggu tok tang bedau sempat di post. Nganti bisi masa ila meh aku post ke dalam blog tok. Enggau peluang tok aku ka meri Selamat Hari Krismas ngagai bala kitai ke nyambut ari Krismas. Besampi ngambi ke Tuhan terus ngemata ka kitai lalu terus ngiring pejalai kitai serta terus meri jereki ba pengidup kitai siko-siko. Baka tudah aku tok enda ulih pulai ke menua ngerami Krismas ke taun tok. Bangat jauh amat menua serta nadai cuti laban ke mayuh amat pengawa perlu di gaga. Semina ngerami krismas ba Melbourne ditu aja la. Keterubah ia ngerami krismas ba menua ribai. Udah mayuh amat lampu-lampu krismas dipeda aku ba sebelah jalai enggau ba rumah-rumah bala sida ribai. Nyau sinu ga ati laban teringat ke diri ke selalu enggau bala anak madi berias ke pun krismas maya ari krismas. Tang nadai ko enggau, nadai jereki berkrismas di menua taun tok.

Peluang tok mega aku ka meri selamat ngintu Taun Baru 2010 ngagai semua kitai. enda berasai nyau udah tembu taun 2009. Mayuh amat pengawa ke nyadi taun 2009 tok tadi tang enda alah dirintai ba ditu. enti nyau bisi ari ila ngarang cerita. Baka kitai ke bisi ati deriba jauh pulai ke menua maya pemisi tok, anang enda bejimat-jimat meh kita ba jalai alun. Nadai ngawa laun datai, janji kita selamat sampai aja. Enti takut ke kerita mayuh, ngatur pengawa diri tumu agi pulai ngambi ke enda kelam-kabut. Bah, selamat ari krismas enggau taun baru. Selamat pemisi semua.......

Ujung Taun............

Pejam enchelak, pejam enchelak. Nyau enda berasai nyau ka masuk bulan 12 (ujung taun 2009). Jampat amat jam berputar. Enda berasai mega ari nyau beganti. Kemari genap 8 bulan udah aku ngejang ari menua. Sigi amat enda berasai nyau udah lapan bulan diau ba Australia ditu. Nyau udah ngapus ke tiga musim udah (autumn, winter enggau diatu nyau pengujung musim spring). Puji Tuhan laban ulih ga ngelaban bemacam-macam musim ba Australia ditu. Nadai ga kala sakit lengit. Taja empai kala ngasai musim baka tok sebedau tok. Sepemanjai udah datai ditu, nadai ga kala sakit (nadai ga ngajih diri empu sakit). Enti di menua suba udu amat kena flu. Tang ditu, puji Tuhan gerai amat tudah aku. Semina udu pedis isi jamah ari ke enda tentu. Sekejap panas amat, sekejap ujan enggau chelap. Siti utai ke amat nyelai ditu peda aku, weather forecast tau enda dipecaya. Enti forecast madah ujan, sigi amat ujan. Pia mega enti forecast madah panas, sigi panas meh ari. Ditu weather forecast cukup beguna. Diau ba Bintulu suba, anang madah jarang, sigi enda kiruh ka meda weather forecast. Tang ditu enggai nyadi enda. Enda alah tekena ke ari celap lebuh bekena ke seluar pandak nurun ke School. Nyau getak-getak diri ngetat ke penyelap. Ari ditu mega cukup nyelai. Enti panas pagi, tengahari tauka malam tau ga ia bertukar nyadi cukup penyelap. Taja pan diatu benung musim spring, kadang-kadang celap, kadang-kadang panas amat munyi ke tulis aku ke lepas.

Sebulan da agi nyau ka nyambut christmas ga bala kitai. Sinu ga ati laban enda ulih pulai maya christmas tok. Mayuh amat pengawa ke alang-alang ke prelu ditembu ka. Enti enda sigi udah ka pulai aku ke menua. Tambah mega bulan 12 ila udah start musim summer kami ditu. Enti pemanas baka menua kitai din enda ga ngawa. Tang munyi ke bala kaban ke udah ensepi musim summer, asai ke masuk dalam microwave ko sida. Nya, bekeni meh asai pemanas enti udah munyinya. Suhu ko sida mencecah 41 C. Apuuuu, Adai pa tan jamah pemanas bakanya. Tang sigi nyelai amat panas ditu sepi aku. Nyelai ari pemanas menua kitai. Taja suhu setakat 32 C, berasai amat pengagat ia. Engka ditu lapisan ozon nyau nipis kini ke ngasuh ia enda tentu nyerap sinaran UV. Nyau lari ari cerita christmas tadi. Ditu kenu ko bala kaban nadai meriah christmas ia. Maya christmas semua kedai di tutup. Ukai bisi budaya ngabang baka kitai di menua orang ditu. Enti bisi pun engka semina diri sebilik aja enggau kaban rapat. Enda nemu meh nama utai ke patut di gaga maya christmas nya ila. Udah la semua kedai tutup, duduk rumah aja meh kini. Tang siti pemanah ia munyi ka bala kaban, 26 December bisi ari ke di kumbai sida boxing day. Mayuh ga orang ngumbai ari tok shopping holiday. Maya tok ila, semua kedai bisi sales enggau rega barang nurun enggau besai (sekitar 50% ke atas). Nya meh bala kaban ngasuh besimpan ke duit maya diatu dikena bebeli ke barang mayanya ila. Bakani ke besimpan ke duit, allowance sara idup semina cukup makai aja. Kadang-kadang nyau enda terapus ke ujung bulan..hahaha....

Nyau lari ari cerita ke tadi, minggu kemari ati aku cukup gaga laban bulih berita paper master aku suba udah di publish ba journal. Akai, bagi kami ke ngadi cigu ba U, nadai berita ke lebih manah ari ninga berita paper di publish ba journal. Puji Tuhan amat. Paper nya mega nyadi book chapter ba sigi bup ke di jual ba Amazon. com. Setiap pengelelak benung ngagai thesis master nya suba asai ke udah tebalas. Ba peringkat ke benung digaga aku diatu, bertambah tusah enggau lelak agi. Nyau majak kusut runding. Munyi ko jako orang, nyau "madai isi' ngadu ke thesis. Ka pe enda, udah pengawa. Bah, mupuk dulu aku. enti bisi masa baru aku nyambung cerita baru ga....

Panas Panas Panas

Akai, panas amat kami di Victoria maya diatu. Taja temparature lebih kurang baka ba Malaysia ( 25 - 35 C) tang pemanas menua ditu cukup nyelai..Asai ka charik kulit jamah pemanas ia..Taja diatu agi musin Spring, tang cukup panas enda milih siang tauka ka malam. enda nemu bakani pemanas enti maya summer ila. Bala kaban ke udah ensepi musin summer semua madah mayanya ila cukup panas. Enda hairan tahun ke suba kampung menua Victoria ditu mayuh angus (bushfire) jamah ari ke cukup ia pemanas. Tinduk malam pun susah amat laban panas ia lain macam. Enda baka asai pemanas menua kitai din.

Tok udah berturut ari lebih kurang seminggu ke udah cukup pemanas. Nurun ke sekula pun semina ngena seluar pandak enggau selipar jepun aja. Bala orang putih nyau bekena ke bikini sebelah padang nyembui diri. Cukup rindu sida tok nyembui diri. Kati enda berasai angat kini asai kulit sida. Udah tembu bejembi, nyau berpitak-pitak tubuh sida jamah sunburn. Cukup nyelai sebengkah ga bansa orang tok. Enti ka bejembi, anang gak tengah ari. Enti tumu pagi tauka lemai enda ga ngawa. Tang engka sigi udah budaya sida kini. Nyau penuh bala padang enda milih dini-dini endur sidai nyembui diri. Nya enda nyalah-nyalah baka nyembui budu/ikan masin ba menua kitai din..hahaha. Bisi sekeda engka enggai bejalai jauh bebai ke pua ba laman diri empu lalu bejembui. Sambil bebai ke utai diempa enggau ai irup. Rindu ga meda utai baka tok. Enti di menua kitai nyau dikelari ke panas. Tang sida ditu nyau nyadi pengerindu sida bermain enggau panas.

Bakani meh gaya bulan 12 ila. Akai, enti lebih panas ari tok enda nemu bakani asai ia. Udah la summer cukup pengelama. Nyau sampai bulan 2 tauka 3 taun dudi. Nadai ga ngawa. Sekurang-kurang ngasai bakani asai pemanas ba menua 4 musim tok.....