Ngelawa Sydney - The Harbour City

Ujung minggu ke udah sempat ngelawa Sydney enggau bala kaban. Sydney tok enda jauh ari Melbourne. Lebih kurang sejam setengah ngena flight ari Melbourne. Enti ngena kereta lebih kurang 8-10 jam bakanya. Sydney tok City ba New South Wales. Dijulok mega ngena nama "The Harbour City". Sepiak negeri Victoria alai Melbourne City. Laban ke nadai budget mayuh (student dini bisi mayuh duit..hahaha), kami sebuat diau ba Malaysia Hall Sydney. Diau dia murah aja laban semina bebayar $6 semalam ajak. Enti diau ba sebelah Hotel sigi amat mar lebih-lebih agi ba Sydney. Laban tuju ati sigi ka bejalai aja, endur tinduk enda tentu milih. Bisi endur kena belelak, kena bertinggal ka barang lalu endur mandi cukup mehnya. Enti bebanding enggau Melbourne, menua Sydney tok cukup besai enggau 'modern" agi. Tambah mega mayuh amat alai endur bejalai. Mayuh pantai ke manah-manah lalu mayuh endur alai "shopping" tauka ke bebeli ke utai. Taraf idup lebih kurang baka Melbourne. Maksud ia barang - barang sama mar!....

Ari Keterubah

Berangkat ari Tullamarine Airport ba melbourne lebih kurang 9.30 pagi. lebih kurang sejam setengah lalu datai ba Sydney Airport. Ari Sydney Airport kami sebuat lalu ngena train ngagai tempat ke dikumbai Sydney Central laban perlu ngambi bas arinya dikena ngagai Malaysia Hall. Datai be Sydney Hall sempat nyinggah ke barang aja laban sayau ke masa tebasau kenu ke jako. Kami sebuat lalu terus bejalai ngagai Circulay Quay. Circular Quay tu "hub" tauka pusat Sydney Harbour. Cukup manah tempat tok laban ia ba tepi pantai lalu dia kitai ulih bejalai ngagai Sydney Opera House enggau meda Sydney Harbour Bridge ke cukup manah. Ditu mega endur feri ke dikena orang bejalai ngagai sebelah pulau tauka pantai. Ditu mega senang ka ngambi bas enti ka bejalai sebelah Sydney ditu lalu bas enda ngetu bejalai sampai ke pagi sigi. Bejalai enda ngetu-ngetu ba sebelah dia enda berasai ari nyau malam. Kami sebuat ngintu diri dia sebedau mupok kediri pulai ngagai Malaysia Hall.

Ari Kedua
Ari kedua kami sebuat ka bejalai ngagai Taronga Zoo laban ko bala kaban Zoo nya manah amat lalu diau ba tepi pantai enggau ba Pulau. Kami sebuat lalu ngena bas ngagai Circular Quay baru laban ka ngambi feri dikena ke Taronga Zoo ba seberai enda jauh ari Sydney Harbour. Lebih kurang 10-15 minit datai ba jetty endur Taronga Zoo tu. Udahnya ngena "Zoo sky safari chair lift" tauka ka cable car ko kitai ngagai puncak zoo. Manah amat view Sydney Harbour dipeda ari dalam cable car tok laban ia dipeda ari tempat ke tinggi. Zoo tok sigi amat cukup besai serta manah amat enti berbanding enggau zoo kita di menua din. Cukup intu lalu beresi amat. Nyau abis sari dikena bejalai -jalai sebelah zoo tok. Lemainya pulai lalu kami sebuat ngagai Chinatown nightmarket ke ba Liverpool street. Kami sebuat lalu ngintu diri dia. Penuh Chinatownnya jamah mensia. Cukup mayuh mensia ba Sydney ditu. Dini-dini endur ke nyadi spot pelancung sigi penuh jamah mensia.

Ari Ketiga

Ari ketiga kami sebuat ngelawa "Bondi Beach" ke cukup famous ba sydney ditu. Pantainya sigi cukup manah amat. Mayuh amat mensia ngelawa pantainya lebih-lebih agi nembiak sekula benung bercuti. Nyau penuh jamah mensia. Bisi ke jogging, surfing tauka berenang. laban tubuh udah cukup lelak, kami sebuat enda tentu lama diau ba beach nya lalu mulai ke diri ngagai Circular Quay baru. Ngambi peluang bejalai sebelah shopping complex/mall sebelah dia sambil bebeli ke siti dua barang sebedau mupok pulai ke Melbourne baru ari sigi.

Ari minggu mulai ke diri ke Melbourne. Cukup rindu ati ngelawa Sydney. Enda rugi masa enggau tenaga munyi ko jako kitai. Dudi-dudi enti bisi peluang agi, ka ga ngelawa Sydney baru. Mayuh alai ke manah-manah bedau sempat dilawa.......

Gambar menua Victoria

Tok gambar-gambar ke di ambi aku benung bejalai sebelah menua Victoria ditu termasuk gambar sebelah Melbourne city...Aku rindu ngambi gambar maya winter tok laban mayuh pun kayu nadai berdaun..manah amat peda aku lebih-lebih agi maya lemai ari masa sunset..

Terima Kasih Tuhan

Akai, nyau enda berasai jam berputar...Enda berasai ga ari nyau bertukar, bulan beganti enggau taun baru ka datai...Nyau majak tuai ga umur tok..30hb sarinya nyau udah bertukar angka umur...Enda berasai nyau udah 30 tahun lebih udah diau ba dunia tok..Tang munyi ko orang, anang ngira tahun, kira bala kaban enggau orang ke bisi di tisi maya tusah enggau maya senang... Aku cukup berterima kasih ngagai Tuhan laban udah ngemanjai ke umur aku setahun agi...Terima kasih mega Tuhan laban nuan udah meri peluang ngagai aku ada ke dunia tok...Di beri APAI (taja aba aku udah nadai 12 tahun ke udah) enggau INDAI ke cukup manah, ngengula ke aku taja nadai tentu tetap penatai pemisi...Di beri bala MENYADI, IPAR serta ANAK BUAH ke cukup nyukung, bertulung pangan diri, meri peransang, melanja sekula enggau semampai bisi serta bersedia nulung lebuh maya dituntung penusah...Di beri BALA KABAN ke cukup manah enggau begulai, selalu nyukung enggau meransang ngambi ke terus maju dalam pengidup..Di beri PENGAWA serta JEREKI, taja pun enda kaya raya baka orang bukai tang cukup dikena ngidup ke diri...Di beri PELUANG SEKULA baru, lebih-lebih agi peluang sekula ngagai menua tasik...Aku cukup berterima kasih Tuhan laban aku nemu semua utai tok sigi datai ari Nuan magang.."God is providing and nothing comes/happens by chance"...Terima kasih Tuhan!...

Mayuh macam pengawa nyadi sepanjai setahun ke udah...Bulan 12 tahun 2008 kemari, siti penguji ke cukup besai dalam pengidup kami sebilik laban mayanya abang tuai aku nadai...Bulan 12 nya mega aku nerima berita ke cukup manah, laban scholarship belajar ngagai menua tasik di lulus ka...Dua pengawa ke berbeda nyadi maya bulan 12 suba...Bulan 2 aku mupok ngagai menua tasik nyambung belajar baru...Bertukar pengidup ari orang ke kereja nyadi student baru.....Diatu, nyau masuk lima bulan udah ngejang ke menua...Enda berasai amat...Taja enda semua utai ke di sampi nyadi ba umur tahun kemari, tang aku cukup gaga ati laban mayuh ga pengawa udah di capai enggau "jayanya"...Kira mayuh la utai ke di kingin ba umur setahun ke udah berjaya dicapai...Enti nanya diri empu puas tauka enda, sigi saut aku enda puas...Laban mayuh ga pengawa bukai bedau di capai...Aku terus besampi ngambi ke umur agi panjai lalu taun tok mayuh agi utai ke di kingin dalam pengidup ulih di gaga...Lebih-lebih agi pemujur dalam pengawa aku ke sekula baru tok..Terus bersampi lalu terus teguh pengarap dalam Tuhan...Terima kasih TUHAN!...