Malam Minggu

Bulan tok bala kaban kitai ka Muslim nyau udah berpuasa...Kesempatan tok aku meri selamat berpuasa ngagai semua bala kaban ka bekunsi macha enggau ngelawa blog aku tok. Berandau pasal bulan puasa tok, lemai kemari aku bisi dikangau bala kaban Muslim ke benung belajar ditu sama-sama enggau sida berbuka puasa. Taja tudah aku enda berpuasa, tang sida tumu-tumu udah ngagau aku enggau sida berbuka puasa ba siti rumah ke endur tiga iko indu dara ari menua kitai din. Sida tiga tok udah kiruh amat berapi enggau bekemas kerumah laban laban ko sida tiga lantang ati enti ulih makai enggau mayuh bala. Terima kasih ngagai najmy, izza enggau Husna ke udah kiruh ngagau ke rumah sida makai (laban aku enda puasa, jadi datai makai aja la..haha). Aku laun mimit datai laban nganti sida ke udah tembu sembahyang. Ngam-ngam sida udah tembu sembahyang baru aku datai. Kira langkah kanan la laban datai terus makai. Bisi lebih kurang 28 iko bala bisi ngulu pengawa makai tok. Nyau penuh rumah sida tiga. Ditu endang mayuh bala student ari Malaysia tang ke nyelai baka aku (bangsa bukai) sigi mimit aja. Nya tudah aku jarang ditinggal ka sida nama bisi ngaga pengawa. Aku rindu mega ngulu pengawa sida laban mayanya ulih begempuru enggau berandau sepengudah lelak untak ngadu ke pengawa Thesis aja.

Tembu makai udah tembu sida sembahyang lalu bisi bermain bunga api. Udahnya "surprise birthday" ngagai sida ke ada kena bulan August tok. Nyau tekenyit bala kaban ke birthday bulan August tok laban nadai nagang bisi pengawa bakanya. Selamat ari pengada ngagai Yusry, Ayob, Bayah enggau Elisha. Rami amat kami malam tadi. Nyau semak ka pukul 10 baru mulai ke diri ke rumah. Malam tok legi bisi ga baru dikumbai bala kaban makai berbuka puasa di rumah sida. Murah amat jereki maya kaban kitai ka Muslim berpuasa tok. Udah dua ari tok enda berasap dapur di rumah...hahaha...

St. Damian's Church, Bundoora

Lama amat udah enda sembahyang sepengudah datai ba menua Victoria ditu. Semina tiga kali aja udah ngagai rumah Tuhan sepemanjai udah diau ditu. Lemai kemari engka ati aku bisi ditegu Tuhan kini hahaha..., nya ngasuh aku lalu nurun sembahyang pagi tok tadi. Lemai kemari aku lalu nanya kaban aku ke ari Sabah dini endur ia selalu sembahyang. Indu siko tok sigi rajin sembahyang. Kediri nyadi meh ia sembahyang. Ia baru datai ditu pun bulan 6 sarinya. Siko lecturer ari UMS ba Sabah din. Dia ia madah ba Bundoora Square lalu tempat tok enda jauh ari tempat endur aku diau. Pagi tadi kami duai sama-sama sembahyang ba St. Damian's Church.

Ari pagi tadi nyelai amat. Pansut ari rumah lalu balat amat beribut. Benung bejalai nganti Tram, enda mukai-mukai ari lalu ujan. Akaiiii, mayuh amat penguji nama udah ka ngagai rumah Tuhan tok...hahaha...Tang ari kami ditu sigi balat amat beribut seminggu tok. Engka nanda ka pengujung "winter" kini lalu ka masuk musim "spring". Aku baru keterubah ia ngelawa church tok, tang kaban akunya udah 4 minggu berturut-turut kia ko ia. Nadai gamal nyelai bukai ba gereja nya. Semina kami duai ia aja. Ke bukai semua orang putih. Semina bisi 3 iko bala cina peda aku. Engka bala student rindu agi sembahyang ke City kini laban nyamai ka bejalai nama udah ambis sembahyang. Nya kebuah nadai meda mayuh gamal orang Asia bukai ba church tok.

Ambis sembahyang tuai ia makai ba kedai cina ba Bundoora square. Ngoder mee ke ala-ala mee kolok kitai ba menua din. Amat asai nyelai mimit, pama meh kena mantup ke tetenguk....haha...Uji kita meda gambar mee tok, enda baka mee kolok kitai din kini...Tang sup kosong ditu enda free baka ba menua din. Enti kitai ba menua din, nama ngoder mee kolok sigi bisi di beri sup kosong. Tang ditu, nama ka sup kosong lalu bebayar. Ka nemu berapa rega sup kosong ka ba mangkuk mit dalam gambarnya...AUD 3!....Nyaaaa, sup kosong pun reganya...Enti tukar ngagai duit kitai din, lebih kurang RM 7-8...Chehhhh, nadai guna-guna!...Enti nyamai amat-amat enda ga ngawa, tok nadai ga bangat nyamai bebanding ngau sup kosong ke free ba menua kitai din!...Akai, sigi tusah nyadi bujang lelang tok.....Assapaiiii, adai pa tan!....

Karaoke di Melbourne

Lama udah aku ngiga endur karaoke ba Melbourne ditu. Laban ke sigi rindu ke pengawa belagu, tusah amat ga ka ninggal ke pengawanya. Enti di Bintulu suba, nyau ka ninting ujung minggu belagu enggau bala kaban. Tang datai ditu tusah mimit laban ke enda nemu dini endur ka ngeradak ka nyawa. Selalu ga nanya orang, tang bila dipadah endur, enda ga nemu dini alainya laban ke bedau tentu nemu tunga menua Victoria ditu. Tambah mega nadai "kaki" ka dibai nyadi ke kaling. Enda disangka-sangka udah tembu bermain lemai ari lima sarinya, kaban aku Fendi lalu nyebut ke pengawa karaokenya. Akai, nyau sigi di anti-anti aku orang nyebut pengawa karaoke. Kami ditu ninting lemai ari lima sigi bisi pengawa bemain ka di atur bala student ari Malaysia. Semina main rindu ati aja enda milih main futsal, volleyball tauka badminton. Pengawa tok sigi selalu digaga sida ari suba-suba sebedau aku datai ditu. Cukup manah ga pegawa gempuru bemain tok laban ulih betemu enggau bala student bukai ke ari Malaysia.

Pulai ngagai pengawa karaoke tadi, dia aku lalu nanya kaban aku Fendinya, "Nama bisi alai karaoke ditu?". Dia ia nyaut, "bisi, macam-macam lagu bisi nyengkaum lagu ari menua Malaysia tauka Indonesia". Ia madah sida sekaban sigi selalu berkaraoke enti masing-masing enda busy enggau pengawa. Udah tudah nyebut pengawanya, dia 12 iko bala kaban ari Malaysia ka enggau.

Kemari, lebih kurang pukul 12 tengah ari, kami sebuat mupuk ngagai endur karaokenya. Bisi tiga iti kerita dikena bala kami. Nama endur karaokenya "K Box", ba La Trobe Street enda jauh ari Melbourne City.Laban kelalu mayuh, kami nempah dua iti bilik. Amat ko kaban aku, macam-macam lagu bisi. Semina ke nadai lagu Iban aja. hahaha....Kami sebuat belagu enda ngetu-ngetu sampai nya raguk nyawa. Belagu berengkah ari pukul 2 ngagai pukul 7. Dini enda nyau raguk nyawa. Taja enda baka alai karaoke kitai di menua din, puas ga ati. Rega karaoke tok enda ga tentu mar laban perlu mayar AUD 18 siko aja sepemanjai 5 jamnya. Bisi dua iti ai free setiap siko enda milih nama-nama ai di order.

Ambis karaoke kami sebuat lalu ngiga alai makai. Kami makai ba "Es Teller", siti restaurant ari menua Indonesia ba Lygon Street. Sekitar jam 9.30 malam kami sebuat mupok mulai kediri. Datai di rumah, udah mandi aku lalu ninduk ke diri. Lelak amat asai isi sepi aku. Pama ga pengelelak asai isi teda puas ngeradak ka nyawa...hahaha...

p/s: Lelenggau amat ka berkaroake ba sebelah Bintulu. Cukup rami menua Bintulu lebih agi maya ujung minggu. Mayuh amat orang pandai belagu din.

Waterfront City, Docklands

Sebedau ngagai Sydney sarinya sempat berjalai ngagai Waterfront City, ba Docklands. Laban kelalu mayuh pengawa, nyau enda ingat kediri mayuh amat ngambi gambar ba Waterfront City sarinya. Tadi mungkar koleksi gambar baru teringat ka gambar ke di ambi ba dia. Sayau disimpan, manah agi di kunsi dalam blog tok pia ko aku.

Waterfront City tok siti tempat baru ba "suburb" Docklands. Enti enda silap aku tempat tok baru tembu sekitar tahun 2005 suba. Tempat tok lebih kurang baka Kuching Waterfront kitai di menua din. Enti Kuching Waterfront ba Sungai Sarawak, Waterfront City tok ba tebing "Yarra River" lalu enda jauh ari Melbourne City. Lebih kurang 10 minit ngena "Tram". Kami ka ari Bundoora nyamai amat ngagai endur tok laban tempat tok station ke pegabis "tram" ke dikena kami ngagai Melbourne City. Mayuh macam utai ke bisi ditu. Bisi tempat "shopping" enggau mayuh tempat endur ngelantang ka ati termasuk "Southern Star Observation Wheel". Utai tok lebih kurang baka "The Eye on Malaysia" kitai ka ba KL nya. Enti ka bershopping, barang dijual ditu boleh tahan ga murah berbanding tempat bukai ba Melbourne ditu. Enda jauh ari sungai, bisi bala patung celebriti ka ternama menua Australia baka Kylie Minogue, Graham Kennedy enggau ke bukai lalu bisi star bala celebriti ba jalai enda nyalah baka " The Hollywood Walk of Fame". Tang enda bangat besai baka ka ba Hollywood nya la. Enda jauh ari Waterfront city bisi Stadium Etihad ke cukup dikelala ba Melbourne ditu laban endu orang selalu bemain "Australian Rules Football" (main tok cukup dikerindu orang menua ditu. Cara main tok baka ke bemain "American Football". Sida lebih rindu ke main tok berbanding enggau main bol kitai ke dikumbai sida "Soccer" ).

Pulai ari waterfront City sempat dibai kaban aku ngagai "Albert Park Grand Prix Circuit", tempat endur orang belumba kerita Formula 1 ba Melbourne ditu. Jalai tok enti ukai maya belumba kerita sigi ditengah orang mayuh laban ia sigi jalai biasa. Semadi maya bisi rami belumba jalai tok ditutup ngagai bala mayuh. Enda nemu bakani orang ulih belumba ba jalai tok laban jalai ia sigi mit amat.



Maya pulai kaban aku lalu mai singgah ngirup ba "Max Brenner". Tempat tok sigi raja chocolate laban utai ke di jual sigi berasaskan chocolate magang-magang. Lalu chocolate ia sigi nyamai amat. Aku lalu ngoder "hot chocolate" enggau strawberry chocolate. Akaiiii, sigi amat nyamai. Sampai dua kali aku ngoder "hot chocolate" ia......Bah neh, cukup meh naka tok dulu..Ila berkongsi cerita baru ga...mupok aku...

Bemain Snow ba Mount (Mt) Buller

Lelak amat isi sepemanjai sari tok laban ke agi lelak teda ke udah enggau trip bemain snow ba Mt. Buller kemari. Trip tok di atur pesatuan postgradute tauka di kumbai The La Trobe University Postgraduate Association (LUPA). Laban ke mayuh bala kaban enggau trip tok, lalu udah bendar di bai bala kaban, aku lalu "tumpang sekaki" mega. Semakin mayuh kaban enggau, semakin ragak ko sida ia. Auk ga, ko aku. Tambah mega ukai nyamai meda "snow" ba menua Victoria ditu. Australia tok enda baka menua - menua ke celap bukai. Enti ba menua sida Endun Ocy ( Ba Scotland tauka ba sebelah menua UK din, enti maya winter, snow sigi ba pala tangga pelaba aku ( enda bakanya ia endu Ocy?). Tang kami ba Australia ditu snow semina bisi ba sebelah gunung tauka tempat ke tinggi aja. Enda datai ba pala tangga. Nya kebuah enti maya musim winter (June - August), mayuh orang ditu niki gunung laban ka bemain snow (baka ka bemain snowboarding tauka skiing). Paling ngam ko sida bulan lapan (August) tok meh laban mayanya snow benung manah. Aku pun enda nemu nama utai ke di kumbai sida ia "snow ke manah"nya. Auk aja meh ko aku. Dalam ati, sigi enda milih snow ke manah tauka snow ke jai. Janji bisi snow udah mehnya, pia ko aku bejako kediri...hahaha..Ukai kitai kala meda snow. Ba Malaysia, ketul ais kala meh meda. Utai ka snow-snow tok semina kala meda ba Tv tauka internet aja.

Tumu pagi kemari, pukul 4 pagi udah dani tudah aku. Laban bas ka dikena bekejang ari University tumu amat. Pukul 6 udah bekejang. Aku minta ambi kaban pukul 5 pagi laban takut enggai ka nadai "Tram" tumu pagi di kena ngagai University. Ngam -ngam pukul 6 pagi, bas bekejang ngagai Mt. Buller. Nadai kosong bas. Penuh magang jamah bala student ( lebih-lebih agi student ari Asia). Sida tok engka baka kami sekaban ari Malaysia mega mehnya. Jakun laban enda kala meda ais enggau mata diri empu lalu gagit ka bemain ais....hahaha...Pama ga penyauh Mt. Buller ari University. Lebih kurang 4-5 jam. Patutla bas tok tumu bekejang. Sepemanjai jalai ngagai Mt. Buller sigi mansa bala ladang aja. Cukup manah ladang orang ditu. Nyau hijau serta beresi amat. Ladang tok dikena sida betupi ke lembu, kambin tauka kuda. Cukup besai serta luas amat. Laban kelalu lama dalam bas, nyau ngantuk lalu sempat tinduk. Lebih kurang 4 jam udahnya dia bas lalu ngetu ba kedai endur nyewa "equipment" dikena bemain snow ba atas gunung din. Aku nyewa "snowboard" enggau kaban aku siko nyewa "ski". Legi betukar-tukar ngena ko tuai ia. Nyamai ga bakanya. Ulih main macam-macam sekaligus. Udah ambisnya, lebih kurang 50 minit ari tempat nyewanya, kami datai ba atas gunung. Apu!..pia ko aku. Tok gamal snow. Cukup manah lalu penyelap anang nyebut. Sigi cukup celap. nasib udah bersedia bekena ke baju tebal. Orang sigi cukup mayuh. Tambah - tambah agi maya ujung minggu. Kami sebuat lalu makai dulu enggai ke enda cukup tenaga bemain snow kenu ko jako...hahaha....Udahnya terus bemain snow sampai 4 jam. Dini enda lelak amat isi. Udahla celap, basah agi jamah snow. Tang enda ngawa, ukai selalu ko jako. Kala uda ditu, main puas - puas. Kada bisi ari agi kitu ila - ila. Tambah tempat tok jauh amat.

Nyau semak ka pukul 5 kami sebuat mupuk mulai ke diri baru ngagai Bundoora. Pengelelak enda ibuh dikira. Isi cukup pemedis. Enti diau ba Bintulu nyau nganjung diri pegi urut...hahaha...Datai di rumah nyau semak ka pukul 10 malam. Datai semina sempat nuci mua. Udahnya lalu terus tinduk. Nadai berasai dani nyau ka semak tengahari saritok...hahaha...best, sigi best amat...pagi ila start mecah ke pala berunding baru...Ngaga pengawa Thesis....akaiiiiiii....

p/s:.. bala kaban di Bintulu, kemaya agi ka kitu?...Enti ka kitu, anang ujung tahun..Maya summer, cukup anggat ditu... Kitu maya bulan 7 tauka bulan lapan tahun dudi...Kitai main snow baru...best 3x.....