Merry Christmas and Happy New Year 2010

Lama amat nadai update blog aku tok. Nadai ari amat ka bekarang ke cerita. Mayuh ga aktiviti di gaga beberapa minggu tok tang bedau sempat di post. Nganti bisi masa ila meh aku post ke dalam blog tok. Enggau peluang tok aku ka meri Selamat Hari Krismas ngagai bala kitai ke nyambut ari Krismas. Besampi ngambi ke Tuhan terus ngemata ka kitai lalu terus ngiring pejalai kitai serta terus meri jereki ba pengidup kitai siko-siko. Baka tudah aku tok enda ulih pulai ke menua ngerami Krismas ke taun tok. Bangat jauh amat menua serta nadai cuti laban ke mayuh amat pengawa perlu di gaga. Semina ngerami krismas ba Melbourne ditu aja la. Keterubah ia ngerami krismas ba menua ribai. Udah mayuh amat lampu-lampu krismas dipeda aku ba sebelah jalai enggau ba rumah-rumah bala sida ribai. Nyau sinu ga ati laban teringat ke diri ke selalu enggau bala anak madi berias ke pun krismas maya ari krismas. Tang nadai ko enggau, nadai jereki berkrismas di menua taun tok.

Peluang tok mega aku ka meri selamat ngintu Taun Baru 2010 ngagai semua kitai. enda berasai nyau udah tembu taun 2009. Mayuh amat pengawa ke nyadi taun 2009 tok tadi tang enda alah dirintai ba ditu. enti nyau bisi ari ila ngarang cerita. Baka kitai ke bisi ati deriba jauh pulai ke menua maya pemisi tok, anang enda bejimat-jimat meh kita ba jalai alun. Nadai ngawa laun datai, janji kita selamat sampai aja. Enti takut ke kerita mayuh, ngatur pengawa diri tumu agi pulai ngambi ke enda kelam-kabut. Bah, selamat ari krismas enggau taun baru. Selamat pemisi semua.......

Ujung Taun............

Pejam enchelak, pejam enchelak. Nyau enda berasai nyau ka masuk bulan 12 (ujung taun 2009). Jampat amat jam berputar. Enda berasai mega ari nyau beganti. Kemari genap 8 bulan udah aku ngejang ari menua. Sigi amat enda berasai nyau udah lapan bulan diau ba Australia ditu. Nyau udah ngapus ke tiga musim udah (autumn, winter enggau diatu nyau pengujung musim spring). Puji Tuhan laban ulih ga ngelaban bemacam-macam musim ba Australia ditu. Nadai ga kala sakit lengit. Taja empai kala ngasai musim baka tok sebedau tok. Sepemanjai udah datai ditu, nadai ga kala sakit (nadai ga ngajih diri empu sakit). Enti di menua suba udu amat kena flu. Tang ditu, puji Tuhan gerai amat tudah aku. Semina udu pedis isi jamah ari ke enda tentu. Sekejap panas amat, sekejap ujan enggau chelap. Siti utai ke amat nyelai ditu peda aku, weather forecast tau enda dipecaya. Enti forecast madah ujan, sigi amat ujan. Pia mega enti forecast madah panas, sigi panas meh ari. Ditu weather forecast cukup beguna. Diau ba Bintulu suba, anang madah jarang, sigi enda kiruh ka meda weather forecast. Tang ditu enggai nyadi enda. Enda alah tekena ke ari celap lebuh bekena ke seluar pandak nurun ke School. Nyau getak-getak diri ngetat ke penyelap. Ari ditu mega cukup nyelai. Enti panas pagi, tengahari tauka malam tau ga ia bertukar nyadi cukup penyelap. Taja pan diatu benung musim spring, kadang-kadang celap, kadang-kadang panas amat munyi ke tulis aku ke lepas.

Sebulan da agi nyau ka nyambut christmas ga bala kitai. Sinu ga ati laban enda ulih pulai maya christmas tok. Mayuh amat pengawa ke alang-alang ke prelu ditembu ka. Enti enda sigi udah ka pulai aku ke menua. Tambah mega bulan 12 ila udah start musim summer kami ditu. Enti pemanas baka menua kitai din enda ga ngawa. Tang munyi ke bala kaban ke udah ensepi musim summer, asai ke masuk dalam microwave ko sida. Nya, bekeni meh asai pemanas enti udah munyinya. Suhu ko sida mencecah 41 C. Apuuuu, Adai pa tan jamah pemanas bakanya. Tang sigi nyelai amat panas ditu sepi aku. Nyelai ari pemanas menua kitai. Taja suhu setakat 32 C, berasai amat pengagat ia. Engka ditu lapisan ozon nyau nipis kini ke ngasuh ia enda tentu nyerap sinaran UV. Nyau lari ari cerita christmas tadi. Ditu kenu ko bala kaban nadai meriah christmas ia. Maya christmas semua kedai di tutup. Ukai bisi budaya ngabang baka kitai di menua orang ditu. Enti bisi pun engka semina diri sebilik aja enggau kaban rapat. Enda nemu meh nama utai ke patut di gaga maya christmas nya ila. Udah la semua kedai tutup, duduk rumah aja meh kini. Tang siti pemanah ia munyi ka bala kaban, 26 December bisi ari ke di kumbai sida boxing day. Mayuh ga orang ngumbai ari tok shopping holiday. Maya tok ila, semua kedai bisi sales enggau rega barang nurun enggau besai (sekitar 50% ke atas). Nya meh bala kaban ngasuh besimpan ke duit maya diatu dikena bebeli ke barang mayanya ila. Bakani ke besimpan ke duit, allowance sara idup semina cukup makai aja. Kadang-kadang nyau enda terapus ke ujung bulan..hahaha....

Nyau lari ari cerita ke tadi, minggu kemari ati aku cukup gaga laban bulih berita paper master aku suba udah di publish ba journal. Akai, bagi kami ke ngadi cigu ba U, nadai berita ke lebih manah ari ninga berita paper di publish ba journal. Puji Tuhan amat. Paper nya mega nyadi book chapter ba sigi bup ke di jual ba Amazon. com. Setiap pengelelak benung ngagai thesis master nya suba asai ke udah tebalas. Ba peringkat ke benung digaga aku diatu, bertambah tusah enggau lelak agi. Nyau majak kusut runding. Munyi ko jako orang, nyau "madai isi' ngadu ke thesis. Ka pe enda, udah pengawa. Bah, mupuk dulu aku. enti bisi masa baru aku nyambung cerita baru ga....

Panas Panas Panas

Akai, panas amat kami di Victoria maya diatu. Taja temparature lebih kurang baka ba Malaysia ( 25 - 35 C) tang pemanas menua ditu cukup nyelai..Asai ka charik kulit jamah pemanas ia..Taja diatu agi musin Spring, tang cukup panas enda milih siang tauka ka malam. enda nemu bakani pemanas enti maya summer ila. Bala kaban ke udah ensepi musin summer semua madah mayanya ila cukup panas. Enda hairan tahun ke suba kampung menua Victoria ditu mayuh angus (bushfire) jamah ari ke cukup ia pemanas. Tinduk malam pun susah amat laban panas ia lain macam. Enda baka asai pemanas menua kitai din.

Tok udah berturut ari lebih kurang seminggu ke udah cukup pemanas. Nurun ke sekula pun semina ngena seluar pandak enggau selipar jepun aja. Bala orang putih nyau bekena ke bikini sebelah padang nyembui diri. Cukup rindu sida tok nyembui diri. Kati enda berasai angat kini asai kulit sida. Udah tembu bejembi, nyau berpitak-pitak tubuh sida jamah sunburn. Cukup nyelai sebengkah ga bansa orang tok. Enti ka bejembi, anang gak tengah ari. Enti tumu pagi tauka lemai enda ga ngawa. Tang engka sigi udah budaya sida kini. Nyau penuh bala padang enda milih dini-dini endur sidai nyembui diri. Nya enda nyalah-nyalah baka nyembui budu/ikan masin ba menua kitai din..hahaha. Bisi sekeda engka enggai bejalai jauh bebai ke pua ba laman diri empu lalu bejembui. Sambil bebai ke utai diempa enggau ai irup. Rindu ga meda utai baka tok. Enti di menua kitai nyau dikelari ke panas. Tang sida ditu nyau nyadi pengerindu sida bermain enggau panas.

Bakani meh gaya bulan 12 ila. Akai, enti lebih panas ari tok enda nemu bakani asai ia. Udah la summer cukup pengelama. Nyau sampai bulan 2 tauka 3 taun dudi. Nadai ga ngawa. Sekurang-kurang ngasai bakani asai pemanas ba menua 4 musim tok.....

Busy Busy Busy

Nyau ka semak sebulan blog aku tok enda di "update". Akai, busy amat dua tiga minggu tok...Tok meh penusah ia nama udah sekula baru..Lebih-lebih agi enti nyambung pelajar ngagai peringkat PhD...Nyebut sigi nyamai..Tang ngadu ke ia sigi cukup pemedis...Pejalai ngaga PhD tok sigi cukup tusah. Ninting ari enda milih pagi, tengahari tauka malam, otak sigi semampai berunding. Paling teruk sekali, ati sigi enggai badu-badu tusah laban kelalu mayuh berunding. Setiap ari nanya diri, "Nama utai ke digaga aku saritok?", "Kada cukup utai digaga aku tok?", "Kada supervisor puas ati ke utai ke digaga aku tok?" lalu bermacam-macam tanya enggau saut bukai bersarang ba pala. Paling teruk agi, tanya ke munyi tok "Kada ulih aku nembu ke Thesis aku tok?".Tok meh tanya ke semampai ngasuh irau ati. Kadang -kadang, laban udah kelalu lelak ngadu ke Thesis, selalu ga ati ringat kediri. Nama kebuah aku milih nyambung pelajar ngagai PhD sedangkan peluang enggau ruang ke bukai mayuh amat diluar din. Nama kebuah aku milih pengawa ngadi pengajar sedangkan peluang kerja ke bukai sigi semampai bisi.

Tang lebuh aku berunding dua tiga kali, nadai guna ga aku nesal ke pengawa ke udah nyadi. Semua keputusan tok ukai orang bukai ke milih, tang pemilih aku empu. Nadai ga guna ngetu ngasu ba sekerat jalai aja sedangkan enti ka ngemulai ke diri lebih kurang sama penyauh ia enti aku terus mansang ke mua. Kadang-kadang betul ga munyi jako peransang, enti ka bulih "kejayaan", perlu bersedia ngerentas penusah dulu. Jarang kitai bulih "kejayaan" semina begoyang kaki aya. Sekurang-kurang, kitai ensepi pemerinsa dulu nya baru puas ati enti pengawa ti ka di capai kitainya mujor. Masanya baru kitai "appreciate" setiap penusah ke ditempoh kitai lebuh maya ngasu ke utai ke dikingin ati. Alang-alang udah bekayuh enggau basah, manah agi terus ngemudi ke perau datai ba adan ke di tuju. Ukai selalu peluang datai dalam pengidup. Sekali peluang datai, taja tusah, taja perit, pajak enggau telan meh aja. Ukai lama, semina 3 ngagai 4 tahun aja idup merinsa besulu enggau bebini ke bup aja. Semampi besampi setiap ari ngambi ke Tuhan merkat ke pengawa PhD aku tok...

P/S: Ukai maksud post aku tok ka matah ke semangat bala kitai ti ka ngambung pelajar ngagai peringkat PhD. Semina bekunsi pengalaman diri empu aja. Sebaliknya aku meransang bala kitai lebih-lebih agi bansa Iban nyambung ke sekula sida ngagai peringkat ke lebih tinggi. Munyi ke jako Francis Bacon " Knowledge is Power" tauka Napoleon Hill " Knowledge is only potential power"..................

The 2009 Tesselaar Tulip Festival

Diatu benung musim spring ba Australia ditu. Sepengudah musim winter sarinya, ba musim spring segala macam bunga benung tumbuh magang. Cukup manah dipeda. Lebuh maya winter sarinya, bala pun kayu nyau nadai bedaun magang. Nyau gondol munnci ke kitai. Tang diatu, bala daun enggau bermacam bungai benung tumbuh. Rindu meda sebelah jalai enggau sebelah taman tumbuh bungai ke bermacam-macam warna. Sigi utai ke cukup ngerindu ke ati meda ianya bungai tulip. Kemari aku dibai bala kaban ngagai ladang bungai tulip laban ke enggau ngerami ke pengerami ke di kumbai sida ditu "The Tesselaar Tulip Festival" ba Silvan, Victoria. Enda jauh ari Melbourne, lebih kurang sejam ngena kerita. Pesta tok di adu ke sida setiap tahun benung maya musim spring. Cukup manah endur ladang bungai tulip tok laban ia ba sebelah bukit enda jauh ari ladang endur sida nupi bala sida chapi enggau ladang buah baka buah strawberry, epal enggau macam-macam buah bukai.

Bisi sepuluh iko kami, ngam-ngam cukup dua iti kerita. Berangkat ari Bundoora lebih kurang pukul 9 lalu datai din kira pukul 10 pagi. Datai din bala ngau bepecah laban masing-masing nyau gagit meda bungai tulip lebih-lebih agi bal sida ke indu. Nyau latak bala kasut enggau seluar sida jamah lumpur teda ke bendar amat "berposing" ngambi gambar sebelah bungai. Siti pengurang ia laban ditu benung awal musim spring. Nya alai bala bungai tulip bedau tentu berkembang lalu empai tentu tinggi. Taja pia tetap manah dipeda. Enda berasai nyau seari suntuk masa abis jamah bejalai sebelah ladangnya. Taja pan bisi ujan mimit, enda ga endu ngachau bala laban masing-masing udah besedia mai payung. Udah tembu ujan, bertambah manah bungai dipeda. Kemari benung sida ari menua Turki ngagai festival. Minggu dudi minggu sida ari menua Belanda lalu macam-macam festival ari menua bukai ka digaga din sepemanjai musim spring tok.

Saritok tadi bendar amat ga ngabang ngagai bala kaban ke Muslim. Ditu sigi mayuh bala student ari menua kitai lalu mayuh bala enda ulih pulai ke Malaysia laban masing-masing benung sibuk ngadu ke pengawa sekula. Nya alai mayuh amat bala kaban ngagau ngabang ke rumah. Sampai enda sempat ngagai rumah sekeda laban udah kelalu lelak enggau kelalu kenyang. Tok pun baru pulai ke rumah. Bah mupok dulu. Nyau ngantuk amat mata jamah kelalu lelak enggau kenyang. Pagi ila nyau sekula baru ga. Ka ngambi tenaga dulu. Selamat malam semua......

Tekenang ke menua.....

Mayuh amat aku meda kerita ke digaga Malaysia ba Australia ditu. Ke selalu dipeda aku kerita Satria GTi kitai. Bisi mega aku meda Proton Persona ba sebelah jalai. Enti benung tepeda kerita Malaysia, bangga amat asai ati. Bisi ga orang putih beguna ke product kitai. Sambil-sambilnya tiba-tiba ati teringat ke menua. Nyau sinu ga asai ia sambil meda kerita kitai nya ngelunsur bejalai. Enti ba Malaysia din, nyau nadai "perasaan" lebuh maya meda kerita ke digaga kitai empu. Tang lebuh maya belelang tok, tak nyelai asai ia. Engka nyau udah lelengau ke orang ka ba menua din mehnya kini. Gambar tok di ambi aku ari lima nyin kemari maya mansa parking ba school. Kerita Proton Persona kitai.

Lemai tok tadi pulai ari school aku tepeda ka sampul surat ke bebunyi "hoo-ahh". Nyau munyi "oooohaaa" kitai din enti lebuh maya begawai tauka benung ngirup enggau bala kaban.hahaha...Nemu ga orang ditu manjung munyi kitai Iban. Suratnya pasal pizza promotion. Suratnya mega nyau ngasuh aku tekenang ke menua. Akai, nyau gila bayang seminggu dua tok berunding pasal menua aja-aja. Enti menua semak enggau enti pengawa enda mayuh, nyau aku mutar kediri pulai ke menua. Assapaiii, semadi meh menua jauh enggau pengawa mayuh amat!....

City, Blok M enggau Yarra River....

Cukup lama aku udah enda nurun ke Melbourne City laban ke cukup nadai ari enggau sibuk ngadu ke pengawa ke perlu di anjung ngagai supervisor. Kemari, bala kaban mai nurun ngagai city sambil meda-meda barang ko sida laban diatu benung bisi discount beserimpai enggau Father’s Day. Ba Australia ditu, Fathers' Day disambut saritok (6 September)tauka ari minggu keterubah bulan September.Ari nyambut Father’s day ba Australia ditu engka lain ari menua bukai laban enti enda silap aku Father’s Day disambut ari minggu ketiga ba bulan June ba menua bukai (minta ampun enti salah). Serimbai enggau Father’s Day tok (taja kami di Australia tok laun ari menua bukai), aku ka meri happy Father’s Day ngagai semua bala aki, aya, madi enggau bala kaban ke udah nyadi apai ba dini-dini endur kita diau. Nya, nyau lari cerita aku seudah ke bekenang ke Father’s Day tok. Laun kami sekaban nurun, lebih kurang pukul 3 lemai bakanya laban pagi semua bisi pengawa magang. Laban kaban bisi kerita, nya ngasuh nyamai amat bejalai taja nurun laun. Enti ngena Tram, nyau ka sejam ke city kin. Tang enti ngena kerita, enda sampai 20 minit.

Bala kaban bisi meh bebeli ke utai. Tudah aku laban sigi nadai ngadang ka bebeli ke utai, meda sida aja meh. Tambah agi mar peda aku bala gari taja bisi Father’s Day sale. Sigi rindu ngulu bala kaban aja sambil-sambil ngambi gambar. Abis bebeli ke utai, kami sebuat lalu ngiga alai endur makai. Di bai sida makai ba Blok M. Blok M tok kedai makai ke dibuka Tauke ari menua Indonesia. Tok udah kedua kali aku makai dia. Umbas ya ga penyamai utai di empa dia. Labih kurang utai empa kitai di Malaysia din mehnya. Ditu taja rega utai empa sekitar 10 -15 dollar sepinggai, tang dalam pinggainya cukup mayuh. Kadang-kadang enda ambis di empa laban kelalu mayuh.

Udah ambis makai kami sebuat bejalai nisi sungai Yarra laban cukup rami tempatnya lebih-lebih agi maya ujung minggu. Sambil-sambilnya singgah ba kedai sebelah dia sambil makai kek enggau ngirup kopi panas. Bejalai malam ditu cukup celap. Nya ngasuh isi jampat amat lelak. Tang bulan 9 tok nyau pama agi penyelap laban nyau ka ujung musim winter kami diatu. Udah tok masuk musim spring kami di Australia ditu. Nya kbuah diatu bala bungai mayuh amat tumbuh ba nisi jalai. Cukup manah amat dipeda aku. Macam-macam warna enggau bentuk bungai. Bala kaban ke udah lama ditu madah, pengujung bulan sembilan tok ila cukup manah ko sida laban mayanya benung bala bungai tumbuh enggau bebungai. Ka ga enggau bala sida bejalai ke ladang-ladang bungai ila laban ko sida madah sigi cukup manah lebih-lebih agi ladang bungai ke sebelah gunung din.

Nyau lelak bejalai, kami sebuat mupok pulai baru ngagai Bundoora. Akai, cukup lelak bejalai taja enda ga tentu lama. Pulai ambis mandi aku lalu ninduk ke diri. Enda berasai pagi tadi dani nyau semak ka pukul Sembilan. Agi ngetat ke pengelelak jamah ka bejalai kemari. Saritok ka ngurung diri di rumah aja. Enda dapat pansut agi. Tambah mayuh amat pengawa empai tembu di gaga. Selamat ujung minggu semua…Mupok aku…

Malam Minggu

Bulan tok bala kaban kitai ka Muslim nyau udah berpuasa...Kesempatan tok aku meri selamat berpuasa ngagai semua bala kaban ka bekunsi macha enggau ngelawa blog aku tok. Berandau pasal bulan puasa tok, lemai kemari aku bisi dikangau bala kaban Muslim ke benung belajar ditu sama-sama enggau sida berbuka puasa. Taja tudah aku enda berpuasa, tang sida tumu-tumu udah ngagau aku enggau sida berbuka puasa ba siti rumah ke endur tiga iko indu dara ari menua kitai din. Sida tiga tok udah kiruh amat berapi enggau bekemas kerumah laban laban ko sida tiga lantang ati enti ulih makai enggau mayuh bala. Terima kasih ngagai najmy, izza enggau Husna ke udah kiruh ngagau ke rumah sida makai (laban aku enda puasa, jadi datai makai aja la..haha). Aku laun mimit datai laban nganti sida ke udah tembu sembahyang. Ngam-ngam sida udah tembu sembahyang baru aku datai. Kira langkah kanan la laban datai terus makai. Bisi lebih kurang 28 iko bala bisi ngulu pengawa makai tok. Nyau penuh rumah sida tiga. Ditu endang mayuh bala student ari Malaysia tang ke nyelai baka aku (bangsa bukai) sigi mimit aja. Nya tudah aku jarang ditinggal ka sida nama bisi ngaga pengawa. Aku rindu mega ngulu pengawa sida laban mayanya ulih begempuru enggau berandau sepengudah lelak untak ngadu ke pengawa Thesis aja.

Tembu makai udah tembu sida sembahyang lalu bisi bermain bunga api. Udahnya "surprise birthday" ngagai sida ke ada kena bulan August tok. Nyau tekenyit bala kaban ke birthday bulan August tok laban nadai nagang bisi pengawa bakanya. Selamat ari pengada ngagai Yusry, Ayob, Bayah enggau Elisha. Rami amat kami malam tadi. Nyau semak ka pukul 10 baru mulai ke diri ke rumah. Malam tok legi bisi ga baru dikumbai bala kaban makai berbuka puasa di rumah sida. Murah amat jereki maya kaban kitai ka Muslim berpuasa tok. Udah dua ari tok enda berasap dapur di rumah...hahaha...

St. Damian's Church, Bundoora

Lama amat udah enda sembahyang sepengudah datai ba menua Victoria ditu. Semina tiga kali aja udah ngagai rumah Tuhan sepemanjai udah diau ditu. Lemai kemari engka ati aku bisi ditegu Tuhan kini hahaha..., nya ngasuh aku lalu nurun sembahyang pagi tok tadi. Lemai kemari aku lalu nanya kaban aku ke ari Sabah dini endur ia selalu sembahyang. Indu siko tok sigi rajin sembahyang. Kediri nyadi meh ia sembahyang. Ia baru datai ditu pun bulan 6 sarinya. Siko lecturer ari UMS ba Sabah din. Dia ia madah ba Bundoora Square lalu tempat tok enda jauh ari tempat endur aku diau. Pagi tadi kami duai sama-sama sembahyang ba St. Damian's Church.

Ari pagi tadi nyelai amat. Pansut ari rumah lalu balat amat beribut. Benung bejalai nganti Tram, enda mukai-mukai ari lalu ujan. Akaiiii, mayuh amat penguji nama udah ka ngagai rumah Tuhan tok...hahaha...Tang ari kami ditu sigi balat amat beribut seminggu tok. Engka nanda ka pengujung "winter" kini lalu ka masuk musim "spring". Aku baru keterubah ia ngelawa church tok, tang kaban akunya udah 4 minggu berturut-turut kia ko ia. Nadai gamal nyelai bukai ba gereja nya. Semina kami duai ia aja. Ke bukai semua orang putih. Semina bisi 3 iko bala cina peda aku. Engka bala student rindu agi sembahyang ke City kini laban nyamai ka bejalai nama udah ambis sembahyang. Nya kebuah nadai meda mayuh gamal orang Asia bukai ba church tok.

Ambis sembahyang tuai ia makai ba kedai cina ba Bundoora square. Ngoder mee ke ala-ala mee kolok kitai ba menua din. Amat asai nyelai mimit, pama meh kena mantup ke tetenguk....haha...Uji kita meda gambar mee tok, enda baka mee kolok kitai din kini...Tang sup kosong ditu enda free baka ba menua din. Enti kitai ba menua din, nama ngoder mee kolok sigi bisi di beri sup kosong. Tang ditu, nama ka sup kosong lalu bebayar. Ka nemu berapa rega sup kosong ka ba mangkuk mit dalam gambarnya...AUD 3!....Nyaaaa, sup kosong pun reganya...Enti tukar ngagai duit kitai din, lebih kurang RM 7-8...Chehhhh, nadai guna-guna!...Enti nyamai amat-amat enda ga ngawa, tok nadai ga bangat nyamai bebanding ngau sup kosong ke free ba menua kitai din!...Akai, sigi tusah nyadi bujang lelang tok.....Assapaiiii, adai pa tan!....

Karaoke di Melbourne

Lama udah aku ngiga endur karaoke ba Melbourne ditu. Laban ke sigi rindu ke pengawa belagu, tusah amat ga ka ninggal ke pengawanya. Enti di Bintulu suba, nyau ka ninting ujung minggu belagu enggau bala kaban. Tang datai ditu tusah mimit laban ke enda nemu dini endur ka ngeradak ka nyawa. Selalu ga nanya orang, tang bila dipadah endur, enda ga nemu dini alainya laban ke bedau tentu nemu tunga menua Victoria ditu. Tambah mega nadai "kaki" ka dibai nyadi ke kaling. Enda disangka-sangka udah tembu bermain lemai ari lima sarinya, kaban aku Fendi lalu nyebut ke pengawa karaokenya. Akai, nyau sigi di anti-anti aku orang nyebut pengawa karaoke. Kami ditu ninting lemai ari lima sigi bisi pengawa bemain ka di atur bala student ari Malaysia. Semina main rindu ati aja enda milih main futsal, volleyball tauka badminton. Pengawa tok sigi selalu digaga sida ari suba-suba sebedau aku datai ditu. Cukup manah ga pegawa gempuru bemain tok laban ulih betemu enggau bala student bukai ke ari Malaysia.

Pulai ngagai pengawa karaoke tadi, dia aku lalu nanya kaban aku Fendinya, "Nama bisi alai karaoke ditu?". Dia ia nyaut, "bisi, macam-macam lagu bisi nyengkaum lagu ari menua Malaysia tauka Indonesia". Ia madah sida sekaban sigi selalu berkaraoke enti masing-masing enda busy enggau pengawa. Udah tudah nyebut pengawanya, dia 12 iko bala kaban ari Malaysia ka enggau.

Kemari, lebih kurang pukul 12 tengah ari, kami sebuat mupuk ngagai endur karaokenya. Bisi tiga iti kerita dikena bala kami. Nama endur karaokenya "K Box", ba La Trobe Street enda jauh ari Melbourne City.Laban kelalu mayuh, kami nempah dua iti bilik. Amat ko kaban aku, macam-macam lagu bisi. Semina ke nadai lagu Iban aja. hahaha....Kami sebuat belagu enda ngetu-ngetu sampai nya raguk nyawa. Belagu berengkah ari pukul 2 ngagai pukul 7. Dini enda nyau raguk nyawa. Taja enda baka alai karaoke kitai di menua din, puas ga ati. Rega karaoke tok enda ga tentu mar laban perlu mayar AUD 18 siko aja sepemanjai 5 jamnya. Bisi dua iti ai free setiap siko enda milih nama-nama ai di order.

Ambis karaoke kami sebuat lalu ngiga alai makai. Kami makai ba "Es Teller", siti restaurant ari menua Indonesia ba Lygon Street. Sekitar jam 9.30 malam kami sebuat mupok mulai kediri. Datai di rumah, udah mandi aku lalu ninduk ke diri. Lelak amat asai isi sepi aku. Pama ga pengelelak asai isi teda puas ngeradak ka nyawa...hahaha...

p/s: Lelenggau amat ka berkaroake ba sebelah Bintulu. Cukup rami menua Bintulu lebih agi maya ujung minggu. Mayuh amat orang pandai belagu din.

Waterfront City, Docklands

Sebedau ngagai Sydney sarinya sempat berjalai ngagai Waterfront City, ba Docklands. Laban kelalu mayuh pengawa, nyau enda ingat kediri mayuh amat ngambi gambar ba Waterfront City sarinya. Tadi mungkar koleksi gambar baru teringat ka gambar ke di ambi ba dia. Sayau disimpan, manah agi di kunsi dalam blog tok pia ko aku.

Waterfront City tok siti tempat baru ba "suburb" Docklands. Enti enda silap aku tempat tok baru tembu sekitar tahun 2005 suba. Tempat tok lebih kurang baka Kuching Waterfront kitai di menua din. Enti Kuching Waterfront ba Sungai Sarawak, Waterfront City tok ba tebing "Yarra River" lalu enda jauh ari Melbourne City. Lebih kurang 10 minit ngena "Tram". Kami ka ari Bundoora nyamai amat ngagai endur tok laban tempat tok station ke pegabis "tram" ke dikena kami ngagai Melbourne City. Mayuh macam utai ke bisi ditu. Bisi tempat "shopping" enggau mayuh tempat endur ngelantang ka ati termasuk "Southern Star Observation Wheel". Utai tok lebih kurang baka "The Eye on Malaysia" kitai ka ba KL nya. Enti ka bershopping, barang dijual ditu boleh tahan ga murah berbanding tempat bukai ba Melbourne ditu. Enda jauh ari sungai, bisi bala patung celebriti ka ternama menua Australia baka Kylie Minogue, Graham Kennedy enggau ke bukai lalu bisi star bala celebriti ba jalai enda nyalah baka " The Hollywood Walk of Fame". Tang enda bangat besai baka ka ba Hollywood nya la. Enda jauh ari Waterfront city bisi Stadium Etihad ke cukup dikelala ba Melbourne ditu laban endu orang selalu bemain "Australian Rules Football" (main tok cukup dikerindu orang menua ditu. Cara main tok baka ke bemain "American Football". Sida lebih rindu ke main tok berbanding enggau main bol kitai ke dikumbai sida "Soccer" ).

Pulai ari waterfront City sempat dibai kaban aku ngagai "Albert Park Grand Prix Circuit", tempat endur orang belumba kerita Formula 1 ba Melbourne ditu. Jalai tok enti ukai maya belumba kerita sigi ditengah orang mayuh laban ia sigi jalai biasa. Semadi maya bisi rami belumba jalai tok ditutup ngagai bala mayuh. Enda nemu bakani orang ulih belumba ba jalai tok laban jalai ia sigi mit amat.



Maya pulai kaban aku lalu mai singgah ngirup ba "Max Brenner". Tempat tok sigi raja chocolate laban utai ke di jual sigi berasaskan chocolate magang-magang. Lalu chocolate ia sigi nyamai amat. Aku lalu ngoder "hot chocolate" enggau strawberry chocolate. Akaiiii, sigi amat nyamai. Sampai dua kali aku ngoder "hot chocolate" ia......Bah neh, cukup meh naka tok dulu..Ila berkongsi cerita baru ga...mupok aku...